ԱԶԱՏԱՄԱՐՏԻԿ ՎԱՐԴԱՆ ԲԱԽՇՅԱՆԻ ԱՆՎԱՆ ԴՊՐՈՑԻ ԱՇԱԿԵՐՏՆԵՐՆ ԱՅՑԵԼԵՑԻՆ ԵՊՀ

Ներկաների թվում էին Պատմության ֆակուլտետի դեկան Էդիկ Մինասյանը, միջոցառման կազմակերպիչ, «Վարդանանք» ռազմահայրենասիրական դաստիարակության ակումբի նախագահ Սաթենիկ Աբրահամյանը, Վարդան Բախշյանի մայրը՝ տիկին Աիդան, քույրը՝ Աննա Բախշյանը, Արմավիրի թիվ 2 հիմնական Վարդան Բախշյանի անվան դպրոցի ուսուցիչներն ու աշակերտները: 

ԵՊՀ պատմության ֆակուլտետի դեկան Էդիկ Մինասյանը հյուրերին դիմավորելուց հետո խոսեց ԵՊՀ առաջնեկ ֆակուլտետի ստեղծման և գործունեության մասին, անդրադարձավ ֆակուլտետի շրջանավարտներին ու նրանց անձնվեր գործին Արցախյան ազատամարտի տարիներին:

Պարոն Մինասյանը Վարդան Բախշյան հերոսին հիշեց որպես կազմակերպված, խելացի ու հայրենասիրությամբ աչքի ընկնող մի երիտասարդի, որը, թողնելով ուսումը, մասնակցեց համընդհանուր պայքարին. «Արցախի ազատագրումը Վարդանի ամենամեծ և նվիրական երազանքն էր: Նա էլ, շատ տղաների պես զենքը վերցնելով, իրենով նշանավորեց ազատագրական պայքարի նոր փուլը»:

Վ. Բախշյանի մայրիկի՝ տիկին Աիդայի խոսքով, իր որդին մեծ ոգևորությամբ էր ուսանում ԵՊՀ պատմության ֆակուլտետում:

«Նա տատիկի մոտ էր բնակվում և շաբաթը մեկ անգամ գալիս էր Արմավիր՝ գրքերը շալակած, դեմքի երջանիկ արտահայտությամբ: Վարդանս ստեղծված էր այդ ֆակուլտետի և պատմության մեջ իր անձնվեր գործով մնալու համար,- նշեց հերոսի մայրը և հավելեց:- Այնուամենայնիվ, հայրենիքի հանդեպ սերը գերադասելի էր, ուստի նա մեկնեց ռազմադաշտ՝ գիտակցելով, որ գիտությունը կսպասի, հայրենիքի պաշտպանությունը՝ ոչ»:

Տիկին Աիդայի կարծիքով, աշակերտների մասնագիտական այցերը ԵՊՀ շատ կարևոր են, քանի որ նրանք ծանոթանում են բուհի պատմությանը, ֆակուլտետների գործունեությանը, կողմնորոշվում մասնագիտության ընտրության հարցում:

Արմավիրի թիվ 2 հիմնական՝ Վարդան Բախշյանի անվան դպրոցի 7-րդ դասարանի աշակերտներից Աղասի Դոմիկյանի խոսքով, սա լավագույն առիթն էր իրենց հերոսի հարազատ բուհում լսելու նրա մասին, լինելու այն լսարաններում, որտեղ եղել է Վ. Բախշյանը:

Նշենք, որ միջոցառման մասնակիցները եղան Հնագիտության և ազգագրության ամբիոնի լաբորատորիայում, ինչպես նաև շրջեցին ֆակուլտետի ամբիոններով, ինչից հետո դպրոցականները, մանկավարժները, դասախոսները և ուսանողները Վարդան Բախշյանի հարազատների հետ այցելեցին նաև ՀՀ ՊՆ Եռաբլուր հուշահամալիր-պանթեոն՝ ծաղիկներ դնելու ազատամարտիկի շիրիմին:

Անգին Խաչատրյան