ՀԱՅ, ՌՈՒՍ ԵՎ ՎՐԱՑԻ ՓՈՐՁԱԳԵՏՆԵՐԸ ՀԱՄԱԳՈՐԾԱԿՑՈՒՄ ԵՆ ԺԱՅՌԱՅԻՆ ՄՈՂԵՍՆԵՐԻ ՈՒՍՈՒՄՆԱՍԻՐՈՒԹՅԱՆ ՀԱՄԱՐ

Կենդանաբանության ամբիոնի վարիչ Մարինե Առաքելյանը նշեց, որ ամբիոնի լաբորատորիայում հյուրերը  հոկտեմբերի 14-25-ը համատեղ իրականացրել են ժայռային մողեսների քրոմոսոմների ուսումնասիրություն։

Նշենք, որ համատեղ ուսումնասիրությունը իրականացվում է ԿԳՆ գիտության պետական կոմիտեի և Հիմնարար հետազոտությունների ռուսաստանյան հիմնադրամի կողմից իրականացվող «Ժայռային մողեսների միջտեսակային հիբրիդների մեյոզի ուսումնասիրությունը» թեմայով ծրագրի շրջանակում:

Այս ծրագրի ռուսական կողմի ղեկավարը Վիկտոր Սպանգենբերգն է, իսկ հայկական կողմի ղեկավարը՝ Մարինե Առաքելյանը:

Մ. Առաքելյանը նշեց, որ չնայած կենդանիների հիբրիդացման ուսումնասիրման զգալի փորձին, դեռևս բաց են միջտեսակային հիբրիդների վերարտադրողական մեկուսացման հիմնական ձևերի որոշման խնդիրները. «Ուսումնասիրությունն ուղղված է ժայռային մողեսների կուսածին տեսակների և հիբրիդների մեյոզի առանձնահատկությունների պարզաբանմանը՝ ծնողական տեսակների համեմատ։ Ծրագիրն ընդգրկում է նաև ժայռային մողեսների մոդելային պոպուլյացիաներում տեսակառաջացման վաղ փուլերի հետազոտություն»։

Ամբիոնի վարիչը հավելեց, որ Վրաստանից ժամանած ուսանողները կենդանաբանության ամբիոնի լաբորատորիայում իրականացված փորձի ընթացքում սովորեցին պատրաստել քրոմոսոմային պատրաստուկներ ժայռային  մողեսների ոսկրածուծից և փայծաղից. «Ուսումնասիրությունների նպատակը ողնաշարավորների ցանցաձև էվոլյուցիայի արագ ընթացող տեսակառաջացման մեխանիզմների բացահայտումն է: Ծրագրի շրջանակում բջջագենետիկական հետազոտություններն իրականացվում են Կենդանաբանության ամբիոնի լաբորատորիայում, քանի որ այն  առաջատար տեղ է զբաղեցնում հիբրիդացման եղանակով տեսակառաջացման և Կովկասյան ժայռային մողեսների ցանցաձև էվոլյուցիայի ուսումնասիրության հարցում»:

Մարինե Առաքելյանի խոսքով, համատեղ իրականացվող հետազոտությունները նպաստում են փորձի փոխանակմանը և համագործակցության ընդլայնմանը: 

Նադեժդա Տեր-Աբրահամյան