«ՏԵՍԱՆՅՈՒԹԵՐԸ՝ ՈՐՊԵՍ ԴԱՍԱՎԱՆԴՄԱՆ ԳՈՐԾԻՔ». ԵՊՀ ԴԱՍԱԽՈՍՆԵՐԸ ՎԵՐԱՊԱՏՐԱՍՏՎԵԼ ԵՆ ՊՈՐՏՈՒԳԱԼԻԱՅՈՒՄ

Վերապատրաստման դասընթացներին մասնակցել են Ռոմանագերմանական բանասիրության ֆակուլտետի դասախոս Մարինե Յաղուբյանը և Իրավագիտության ֆակուլտետի դասախոս Անի Սիմոնյանը, ինչպես նաև Հայաստանի, Վրաստանի և Բելառուսի տարբեր բուհերից և տարբեր մասնագիտություններով դասավանդող դասախոսներ:

Ըստ մասնագետների՝ արդի ուսուցման գործընթացում լսարանային և հատկապես արտալսարանային աշխատանքներ կազմակերպելու համար տեսանյութերի պատրաստումն անխուսափելի է:

«Տեսանյութերը` որպես դասավանդման գործիք դասախոսների և ուսանողների համար» խորագրով վերապատրաստման ինտենսիվ դասընթացի շրջանակում մասնակիցները հնարավորություն են ունեցել ծանոթանալու Պորտոյի համալսարանում կիրառվող դասավանդման քաղաքականության մանրամասներին, մասնավորապես տեսանյութեր պատրաստելու, նկարահանելու և մոնտաժելու նորագույն մեթոդաբանությանը:

Մասնակիցներն այցելել են համալսարանի մեդիա լաբորատորիաներ և ռադիոկայան` տեղում նկարահանման և ձայնագրման աշխատանքներին ծանոթանալու նպատակով:

Դասընթացի ժամանակ մասնակիցները ծանոթացել են «Panopto» նորարարական ծրագրի միջոցով արդիական դասընթացներ պատրաստելու հմտություններին և դրանց կիրառման անհրաժեշտությանը:

Աշխատանքային շաբաթը եզրափակվել է ակտիվ քննարկումներով, փորձի փոխանակմամբ, ինչպես նաև մասնակիցների նկարահանած և մոնտաժված տեսաֆիլմերի ներկայացմամբ:

Պատրաստեց Քնար Միսակյանը