ԵՊՀ ՈՒՍԱՆՈՂՆԵՐԻ ՀԱՄԱՐ ՇԱՐՈՒՆԱԿԱԲԱՐ ԿԱԶՄԱԿԵՐՊՎՈՒՄ ԵՆ ԲՈՎԱՆԴԱԿԱԼԻՑ ՀԱՆԴԻՊՈՒՄ-ՔՆՆԱՐԿՈՒՄՆԵՐ
ԵՊՀ ժուռնալիստիկայի ֆակուլտետում անցկացվեց հանդիպում, որի ընթացքում Արամ Աբրահամյանը ներկայացրեց «Ազատ մամուլի առաջին քայլերը Հայաստանի երրորդ Հանրապետությունում» թեմայով դասախոսություն. ծավալվեց քննարկում՝ ազատության կոնցեպտի վերաբերյալ։
![meeting-at-the-Faculty-of-Journalism](/sites/default/files/styles/large_slide/public/migrated/images/xOgO5lTXPdT5rACsNf9IuIK1Yt.jpg?h=bccd1fa5&itok=XCAatkk4)
Ֆակուլտետի դեկան Նաղաշ Մարտիրոսյանը, շնորհակալություն հայտնեց ԵՊՀ շարունակական կրթության կենտրոնի տնօրեն Լուսինե Խառատյանին այսօրինակ միջոցառումների կազմակերպման համար, ապա վստահեցրեց, որ նմանատիպ հանդիպումները շարունակական և հաճախակի են լինելու:
ԵՊՀ շարունակական կրթության կենտրոնի և Ֆրիդրիխ Նաումանի հիմնադրամի համագործակցությամբ կազմակերպված հանդիպումը ընթացիկ ամսվա դասախոսություններից մեկն էր: Հանդիպման նպատակն էր ԵՊՀ ուսանողներին ներկայացնել 2020-2021 թվականների՝ Ֆրիդրիխ Նաումանի «Հանուն ազատության» հիմնադրամի հրատարակած «Հայաստանի Հանրապետության անկախությունը և ազատական բարեփոխումները» երկհատոր ժողովածուն և դրանում ընդգրկված հոդվածները:
Լ. Խառատյանը մեզ հետ զրույցում նշեց, որ հրատարակված հոդվածների հեղինակները կա՛մ իրենք անմիջաբար եղել են բարեփոխումների հեղինակ, կա՛մ ակտիվորեն ներգրավված են եղել տվյալ շրջանի բարեփոխումների աշխատանքներում:
«Արամ Մանուկյանի ջանքերով լույս տեսած ժողովածուն կազմված է Հայաստանի անկախության առաջին շրջանի բարեփոխումներին վերաբերող հոդվածներից, որոնց հեղինակներն արդեն իսկ հանդիպել են ԵՊՀ իրավաբանության, տնտեսագիտության և կառավարման ֆակուլտետների ուսանողների հետ: Այսօրինակ հանդիպումներ կազմակերպվելու են ԵՊՀ բոլոր ֆակուլտետներում. յուրաքանչյուր հոդվածի հեղինակ համապատասխան ֆակուլտետում ներկայացնելու է իր ուսումնասիրությունը»,- ընդգծեց Լ. Խառատյանը:
1990 թվականի օգոստոսի 23-ին ՀՀ անկախության հռչակագիրն ընթերցած Արամ Մանուկյանի և ժուռնալիստիկայի ֆակուլտետի ուսանողների միջև ակտիվ քննարկում ծավալվեց, որից հետո Ա. Մանուկյանն ուսանողներին նվիրեց Անկախության հռչակագրի օրինակներ:
Ներկայացնելով «Հայաստանի Հանրապետության անկախությունը և ազատական բարեփոխումները» ժողովածուն՝ Ա. Մանուկյանն ասաց, որ դրա թարգմանված տարբերակը հասանելի է աշխարհի 20 գրադարաններում և 60 երկրների հայաստանյան դեսպանատներում:
«Հոդվածների սույն ժողովածուն ներկայացնում է իննսունականների ազատական բարեփոխումների ընթացքը և խորհրդային պլանային տնտեսությունից ազատ շուկայական տնտեսության անցումը: Այն ինքնատիպ ժողովածու է, քանի որ հոդվածագիրները եղել են Հայաստանի ազատականացման ակունքներում»,- ասաց Ա. Մանուկյանը:
«Առավոտ» օրաթերթի գլխավոր խմբագիր Արամ Աբրահամյանը, խոսելով ժողովածուի և այնտեղ հրատարակված իր հոդվածի մասին, ասաց. «Երբ ձեզ պետք լինի ուսումնասիրել տվյալ ժամանակաշրջանը, այսինքն՝ մեր պետության ստեղծման հիմքերը, կարդացե՛ք այս հոդվածները, որոնք համապատասխան պատկերացում են տալիս դրանց վերաբերյալ»:
Դասախոսության ընթացքում Ա. Աբրահամյանը ուսանողներին տվեց մասնագիտական խորհուրդներ, ներկայացրեց սեփական փորձը, խոսեց մամուլի ազատության, ինչպես նաև գրաքննության մասին, պատասխանեց ուսանողներին հետաքրքրող հարցերին: