ՄԵԿՆԱՐԿՈՒՄ Է «ԶԲՈՍԱՇՐՋԱՅԻՆ ԹԱՐԳՄԱՆՈՒԹՅՈՒՆ (ԱՆԳԼԵՐԵՆ-ՀԱՅԵՐԵՆ)» ՄԱԳԻՍՏՐՈՍԱԿԱՆ ՆՈՐ ԾՐԱԳԻՐԸ

Մագիստրոսական նոր ծրագրի շնորհանդեսին ներկա էին Եվրոպական լեզուների և հաղորդակցության ֆակուլտետի դեկան Գևորգ Բարսեղյանը, Թարգմանության տեսության և պրակտիկայի ամբիոնի վարիչ Ռուզաննա Ղազարյանը, ամբիոնի պրոֆեսորադասախոսական կազմը, ուսանողներ:

Ողջույնի խոսքում պարոն Բարսեղյանը նշեց, որ «Զբոսաշրջային թարգմանություն (անգլերեն-հայերեն)» մագիստրոսական ծրագիրը եկել է համալրելու մնացած հետաքրքիր ծրագրերի շարքը, որոնք առաջարկում է Թարգմանության տեսության և պրակտիկայի ամբիոնը. «Հարկ է նշել, որ սպասում ենք ՀՀ ԿԳՄՍՆ-ի կողմից տրամադրվող արտոնագրին, ինչը պարզապես օրերի հարց է, ուստի ճիշտ համարեցինք հենց այս պահին ծրագիրը ներկայացնել ուսանողներին»:

Գևորգ Բարսեղյանը շեշտեց, որ Թարգմանության տեսության և պրակտիկայի ամբիոնը շարունակաբար հանդես է գալիս յուրօրինակ նախաձեռնություններով, ինչը միանշանակ արժանի է գովասանքի:

Ֆակուլտետի դեկանը շնորհակալություն հայտնեց ամբիոնի աշխատակիցներին մագիստրոսական ծրագրի կայացման ու կյանքի կոչմանը միտված աշխատանքի համար:

Ներկաներին ողջունեց նաև Թարգմանության տեսության և պրակտիկայի ամբիոնի վարիչ Ռուզաննա Ղազարյանը. «Մենք ունենք սերունդ կրթելու մեծ առաքելություն և պետք է ամեն ինչ անենք, որ այդ սերունդը լինի զարգացած, կիրթ, պատրաստ դիմակայելու ցանկացած մարտահրավերի»:

Տիկին Ղազարյանի խոսքով, ինչքան կիրթ են ազգը, անհատը, այդքան ուժեղ է պետությունը, ինչին էլ միտված են կրթության ոլորտում նախատեսված բոլոր քայլերը: Այնուհետև նա ներկաներին մանրամասն ներկայացրեց իրենց ամբիոնի գործունեությունն ու ուսումնական ծրագրերի առանձնահատկությունները:

«3-րդ կուրսից մեր ուսանողներն ունեն ընտրություն «Վարչագործարարական թարգմանություն» և «Զբոսաշրջային թարգմանություն (անգլերեն-հայերեն)» մագիստրոսական ծրագրերի միջև, այստեղ մենք գործ ունենք ոլորտային անգլերենի (industry english) հետ»,- պարզաբանեց ամբիոնի վարիչը:

Նրա փաստմամբ, «Վարչագործարարական թարգմանություն» մագիստրոսական ծրագրի շրջանակում համագործակցելով Իրավագիտության ֆակուլտետի հետ, ամբիոնը կրթում է ոլորտին քաջատեղյակ մասնագետներ, որոնք դառնում են իրենց գործի գիտակները:

Ռուզաննա Ղազարյանը նշեց նաև, որ «Զբոսաշրջային թարգմանություն (անգլերեն-հայերեն)» մագիստրոսական ծրագիրը նույնպես միջֆակուլտետային ծրագիր է, որի շրջանակում Թարգմանության տեսության և պրակտիկայի ամբիոնը համագործակցում է ԵՊՀ իրավագիտության,  տնտեսագիտության և կառավարման, ինչպես նաև աստվածաբանության ֆակուլտետների հետ:

«Մագիստրոսական մեր ծրագրերը շատ արդյունավետ և հստակ թիմային աշխատանքի արդյունք են, որոնց շնորհիվ մենք ուսանողին տրամադրում ենք աշխատաշուկայի պահանջներին համապատասխան բարձրագույն կրթություն»,- շեշտեց տիկին Ղազարյանը:

Շնորհանդեսի վերջում ամբիոնի վարիչը պատասխանեց ներկաներին հուզող մի շարք հարցերի: 

Անի Պողոսյան