ԵՊՀ ՌԱԴԻՈՖԻԶԻԿԱՅԻ ՖԱԿՈՒԼՏԵՏԻ ԿՐԹԱԿԱՆ ԾՐԱԳՐԵՐԸ ՀԱՄԱՊԱՏԱՍԽԱՆԵՑՎՈՒՄ ԵՆ ԱՇԽԱՐՀԻ ԱՌԱՋԱՏԱՐ ՀԱՄԱԼՍԱՐԱՆՆԵՐԻ ԾՐԱԳՐԵՐԻՆ

ԵՊՀ ռադիոֆիզիկայի ֆակուլտետում կատարվող բարեփոխումների մասին զրուցել ենք ֆակուլտետի դեկան, ֆիզիկամաթեմատիկական գիտությունների դոկտոր Խաչատուր Ներկարարյանի հետ:

Դեկանի խոսքով՝ ֆակուլտետի դեմքը որոշում են կրթական ծրագրերը: Ռադիոֆիզիկայի ֆակուլտետում ձևավորվել է բակալավրիատի նոր կրթական ծրագիր, որն ավելի ընդգրկուն է, համապատասխանում է միջազգային չափորոշիչներին և աշխատաշուկայի պահանջներին:

«Մեր ֆակուլտետում գործող կրթական ծրագրերը շատ են. այժմ փորձում ենք դրանց թիվը նվազեցնել և դարձնել ավելի ընդգրկուն. նախատեսում ենք հաջորդ տարվանից դրանք միավորել մեկ ծրագրի մեջ: Սա հիմնավորվում է նրանով, որ հակված ենք ֆակուլտետի կրթական ծրագրերը աշխարհի առաջատար համալսարանների ծրագրերին համապատասխանեցնելուն: Մեզ համար շատ կարևոր է նաև մեր ուսանողներին աշխատանքով ապահովելը, ինչը տևական ժամանակ է իրագործում ենք ձեռնարկությունների հետ պայմանագրային հիմունքներով համագործակցությունների միջոցով»,- մեզ հետ զրույցում մանրամասնեց ֆակուլտետի դեկանը:

Խ. Ներկարարյանի խոսքով՝ առաջին և երկրորդ կուրսերի ուսանողները միասին կսովորեն, իսկ երրորդ կուրսից կառանձնացվեն՝ ըստ մասնագիտացումների:

Ռադիոֆիզիկայի ֆակուլտետի բարեփոխումների ծրագրում առաջնային է նաև նոր լաբորատորիաների ստեղծումը, անհատական և հետազոտական աշխատանքների քանակի ավելացումը՝ այդպիսով երիտասարդ գիտնականներին ու հետազոտողներին էլ ավելի մոտեցնելով գիտությանը:

«Անչափ կարևորում ենք և փորձում անել ամեն բան, որպեսզի մեր ֆակուլտետի ուսանողները և երիտասարդ հետազոտողները մասնակցեն միջազգային գիտաժողովների, մուտք գործեն միջազգային գիտության ասպարեզ, հետազոտություններ կատարեն, ներգրավվեն գիտության մեջ և հասնեն բարձունքների»,- նշեց Խ. Ներկարարյանը:

Նա փաստեց, որ ֆակուլտետը երիտասարդ հետազտողներին գիտության մեջ ներգրավելու փորձ վաղուց ունի. կիսահաղորդիչների ֆիզիկայի և միկրոէլեկտրոնիկայի ամբիոնը բազային ֆինանսավորումից մագիստրոսներին հատկացնում է գումար՝ թոշակի կամ աշխատանքային վարձավճարի տեսքով, ինչը, իհարկե, շարունակական է լինելու:

«Այս հանգամանքը, անշուշտ, ոգևորում է նրանց, հնարավորություն տալիս ավելի լուրջ մոտենալու այն հետազոտություններին ու դասընթացներին, որոնք կան կրթական ծրագրում»,- ասաց ֆակուլտետի դեկանը:

Խ. Ներկարարյանը մեզ հետ զրույցում անդրադարձավ նաև գիտական ֆինանսավորմանը, նշելով, որ դրամշնորհների թվի մոտավորապես երկու անգամ ավելացումը ֆակուլտետին բազում հաջողություններ է բերել:

«Ուրախությամբ պետք է ասեմ, որ ռադիոֆիզիկայի ֆակուլտետն այս առումով ևս առանձնանում է: Ֆակուլտետում ակնհայտորեն ավելացել է միջազգային բարձրորակ ամսագրերում տպագրված հոդվածների քանակը: Այս հանգամանքն ավելի է ոգևորում մեր երիտասարդ հետազոտողներին և գիտնականներին՝ աշխատելու և հաջողությունների հասնելու»,- ասաց Խ. Ներկարարյանը:

 Նա հավելեց, որ ինժեներական տարբեր հաստատությունները փորձում են կապ հաստատել ու համագործակցել Երևանի պետական համալսարանի հետ, ինչը փաստում է ուսանողների մեծ պոտենցիալի մասին:

ԵՊՀ ռադիոֆիզիկայի ֆակուլտետը, մշտապես հաշվի առնելով ուսանողների կարծիքը, ցանկություններն ու տեսակետները, շարունակական բնույթ ունեցող բարեփոխումների շնորհիվ ֆակուլտետի ուսանողների՝ գիտական ոլորտում հաջողությունների հասնելուն օժանդակելու համար անում է հնարավոր ու անհնարին թվացող ամեն բան՝ տալով բարձրորակ կրթություն, զինելով համապատասխան գիտելիքներով, նպաստելով մասնագիտական ոլորտում աշխատելուն և այլն: