ԵՊՀ Պալեանների անվան դահլիճում ս.թ. դեկտեմբերի 10-ին Հայագիտական հետազոտությունների ինստիտուտի ՀՀ ազգային անվտանգության հետազոտությունների և կանխատեսումների խմբի հովանու ներքո տեղի ունեցավ «ՀՀ արտաքին քաղաքականության արդյունավետ վարման հիմնախնդիրները ազգային անվտանգության համատեքստում» գիտաժողովը։
Միջոցառումը համախմբեց առաջատար հետազոտողների և գիտնականների՝ քննարկելու Հայաստանի արտաքին քաղաքականությանը և ազգային անվտանգությանը վերաբերող հրատապ հարցեր տարածաշրջանային և միջազգային զարգացումների համատեքստում:
Համաժողովը մեկնարկեց ԵՊՀ հայագիտական հետազոտությունների ինստիտուտի տնօրեն Վահրամ Պետրոսյանի բացման խոսքով, ով ընդգծեց աշխարհաքաղաքական բարդ մարտահրավերների դարաշրջանում Հայաստանի արտաքին քաղաքական մոտեցումների արդիականացման ռազմավարական նշանակությունը: Գիտաժողովը բաժանված էր երկու թեմատիկ բաժինների:
«ՀՀ արտաքին քաղաքականության անվտանգության ապահովման հիմնախնդիրները»
Ներկայացվեցին այնպիսի թեմաներ, ինչպիսիք են Հայաստանի արտաքին քաղաքականության արդիականացումը, սպառազինությունների տարածաշրջանային վերահսկողությունը և ենթակառուցվածքների անվտանգությունը: Բանախոսներից Նարեկ Գրիգորյանը՝ ՀՀԻ ՀՀ ազգային անվտանգության հետազոտությունների և կանխատեսումների խմբի ղեկավարը, վերլուծեց Հայաստանի արտաքին քաղաքականության մեթոդաբանական ապահովման խնդիրները տարածաշրջանային և միջազգային անվտանգության զարգացման համատեքստում, Դավիթ Հովհաննիսյանը՝ Հայաստանի վրա նոր աշխարհաքաղաքական փոփոխությունների ազդեցությունը, Անդրանիկ Գրիգորյանը՝ սպառազինությունների վերահսկման խնդիրը ՀՀ արտաքին և անվտանգային քաղաքականության համատեքստում, Հայկ Քոչարյանը՝ Հայաստանի ենթակառուցվածքային անվտանգությունը, իսկ Տիգրան Եփրեմյանը՝ միջազգային հարաբերությունների տեսությունները և իրական աշխարհը արտաքին քաղաքականության վերլուծության համատեքստում։
«ՀՀ արտաքին և ավտանգային մարտահրավերները տարածաշրջանային և միջազգային զարգացումների համատեքստում»
Կարևորվել են այնպիսի հրատապ հարցեր, ինչպիսիք են արաբական երկրներում քաղաքական զարգացումները, հայ-հնդկական ռազմական համագործակցությունը և Թուրքիայի «թուրքական ինտեգրման» քաղաքականությունը։ Մուշեղ Ղահրիյանը ներկայացրեց արաբական աշխարհում փոփոխությունների անվտանգության հետևանքները ՀՀ-ի համար, Տիգրան Հարությունյանը՝ հայ-հնդկական ռազմական համագործակցությունը, Նելլի Մինասյանը՝ թյուրքական ինտեգրացիայի ազդեցությունը Հայաստանի վրա, Լուսինե Սահակյանը՝ համշենահայերի դերը հայկական սփյուռքում, իսկ Անի Ոսկանյանը՝ Օսմանյան կայսրության և հանրապետական Թուրքիայի բանակաշինության առանձնահատկությունները։
Համաժողովն ավարտվեց ներկայացված զեկուցումների վերաբերյալ մասնագիտական քննարկումներով, որին հաջորդեց Վահրամ Պետրոսյանի եզրափակիչ խոսքը, ով ընդգծեց միջդիսցիպլինար համագործակցության կարևորագույն անհրաժեշտությունը ազգային անվտանգության մարտահրավերների լուծման գործում:
Համաժողովը ծառայեց որպես կենսական հարթակ պատկերացումների փոխանակման, երկխոսության խթանման և Հայաստանի ռազմավարական մոտեցումն արտաքին քաղաքականության և անվտանգության ամրապնդման համար:
