ԵՊՀ շարունակական կրթության կենտրոնը (ՇԿԿ) իրականացնում է ֆորմալ և ոչ ֆորմալ կրթական բազմաբնույթ ծրագրեր՝ թիրախային տարբեր խմբերի համար: Ծրագրերը մշակվում են մասնակիցների կարիքների գնահատման հիման վրա և իրականացվում ինչպես ԵՊՀ, այնպես էլ հրավիրյալ դասախոսների կողմից: Ծրագիրն ավարտած և ամփոփիչ ատեստավորում անցած մասնակիցներին տրվում է ԵՊՀ սահմանած նմուշի ավարտական փաստաթուղթ (վկայական, հավաստագիր):
2003 թվականից ԵՊՀ-ն իրականացնում է քաղծառայողների վերապատրաստում պետական կառույցների աշխատակիցների մասնագիտական և ընդհանուր կարողությունները բարելավելու նպատակով:
Վերապատրաստման ծրագրերն իրականացվում են ՀՀ նախագահի, ՀՀ վարչապետի, ՀՀ Ազգային ժողովի աշխատակազմերի, տարբեր նախարարությունների և դրանց ենթակայությամբ գործող պետական կառավարման մարմինների և ՀՀ մարզպետարանների աշխատակազմերի հետ, ՀՀ պաշտպանության նախարարության, ՀՀ ազգային անվտանգության ծառայության և պետական այլ կառույցների հետ համագործակցությամբ:
Իր գործունեության ընթացքում ՇԿԿ-ն քաղծառայողների համար կազմակերպել է 50 դասընթաց, որոնց մասնակցել է 8972 քաղաքացիական ծառայող:
