Մշակութաբանության ամբիոն

ԵՊՀ մշակութաբանության ամբիոնը հիմնադրվել է 2007 թ. համալսարանի պատմության ֆակուլտետում: Ամբիոնը կազմում է մշակութաբանության բաժնի ուսումնական ծրագրերը, կազմակերպում առարկայական դասընթացների իրականացումը, ինչպես նաև համահամալսարանական «Մշակութաբանություն» առարկայի դասավանդումը:

Ամբիոնի դասախոսները ծավալում են գիտահետազոտական ակտիվ գործունեություն մշակութաբանության, մշակութային մարդաբանության և մշակութային ժառանգության բնագավառներում:

Իր գործունեության ընթացքում ամբիոնը ՀՀ Գիտությունների ազգային ակադեմիայի հետ համատեղ իրականացրել է Արցախի Տիգրանակերտի հնագիտական հետազոտություններ, Ֆլորենցիայի համալսարանի հետ համատեղ իրականացրել է «Մետաքսի ճանապարհ. Հայաստան» ծրագիրը, որի արդյունքում, սկսած 2018 թվականից, «էրազմուս+» ծրագրի շրջանակում մշակութաբանության բաժնի այն ուսանողները, որոնք մասնագիտանում են մշակույթի պատմության ու մշակութային ժառանգության ուղղություններով, հնարավորություն ունեն ուսանելու Ֆլորենցիայի համալսարանում (Իտալիա): Այդ ուղղություններն անմիջաբար առնչվում են ծրագրի շրջանակներում իրականացվող «Մետաքսի ճանապարհ Հայաստան․ Վայոց Ձոր» հետազոտական թեմային։

2009 թվականից ի վեր մշակութաբանության ամբիոնը կազմակերպում է «Մշակույթը, պատմությունը և արդիականությունը» խորագրով մշակութաբանական ուսանողական ամենամյա կոնֆերանս, որտեղ զեկուցումներով հանդես են գալիս մշակութաբանության բաժնի բարձր կուրսերի և մագիստրատուրայի ուսանողները: Զեկուցումների քննարկմանը մասնակցում են ինչպես մշակութաբանության ամբիոնի դասախոսները, այնպես էլ հրավիրյալ փորձագետներ:

Ամբիոնի նախաձեռնությամբ ստեղծվել է «Արցախի հուշարձանների մշտադիտարկում» ծրագիրը, որն Արցախի մշակութային ժառանգությունը հետազոտող և առցանց ներկայացնող ակադեմիական ամենամեծ հարթակն է։ Սկսած 2018 թվականից՝ ամբիոնն իրականացնում է նաև «Խաչքարերի ժողովածու. Հայաստանի հանրապետություն, Արցախի հանրապետություն» հետազոտական ծրագիրը։ Բացի դրանից՝ ամբիոնը ԱՀ կրթության, գիտության, մշակույթի և սպորտի նախարարության հետ համագործակցության շրջանակում հնագիտական լայնածավալ հետազոտություններ է կատարել Արցախում և մշակել Արցախի մշակութային քաղաքականության հայեցակարգ։

Գործակցային լայն կապերի շնորհիվ և գործընկերների ֆինանսական աջակցությամբ ամբիոնը մշակութաբանության բաժնի բարձր առաջադիմություն ունեցող և սոցիալապես անապահով ուսանողներին հատկացնում է տարեկան կրթաթոշակներ: Առավել բարձր առաջադիմություն ունեցող և գիտական ու հասարակական ակտիվություն ցուցաբերող ուսանողներին տրամադրվում է անհատական կրթաթոշակ։