Սահմանադրական իրավունքի ամբիոն

Սահմանադրական իրավունքի ամբիոնը հիմնադրվել է 1968 թ.։ Այն ունեցել է տարբեր անվանումներ՝ պետական իրավունքի և սովետական շինարարության, պետական և վարչական իրավունքի, սահմանադրական և միջազգային իրավունքի, իսկ 2006 թ. հունիսի 8-ին վերանվանվել է սահմանադրական իրավունքի ամբիոն։

Տարբեր տարիների ամբիոնը ղեկավարել են իրավաբանական գիտությունների թեկնածու, դոցենտ Ս. Ա. Օսիպյանը, ՀԽՍՀ գիտության վաստակավոր գործիչ, պրոֆեսոր Ա. Ա. Եսայանը, իրավաբանական գիտությունների դոկտոր, պրոֆեսոր Վ.Ռ. Նազարյանը, իրավաբանական գիտությունների դոկտոր, պրոֆեսոր Ն.Ա. Այվազյանը։ Սահմանադրական իրավունքի ամբիոնի վարիչի պաշտոնում երկարատև պաշտոնավարման ընթացքում ունեցած զգալի ավանդի համար ԵՊՀ գիտական խորհուրդը պրոֆեսոր Ն․ Ա․ Այվազյանին ընտրել է որպես ամբիոնի պատվավոր վարիչ։ 2018 թ. ամբիոնի վարիչ է ընտրվել իրավաբանական գիտությունների թեկնածու, դոցենտ Վ. Այվազյանը:

Ամբիոնում ներգրավված են ինչպես տեսաբաններ, այնպես էլ դատական և գործադիր իշխանության, իրավապահ մարմինների համակարգում ճանաչված, փորձառու իրավագետներ, այդ թվում՝ պրոֆեսորադասախոսական գործունեության փորձ ունեցող։

Գիտահետազոտական աշխատանքները կատարվում են հիմնականում սահմանադրաիրավական կարգավորման կառուցակարգում համակարգային հակամարտությունների բացահայտման, սահմանադրականության համակարգագոյացման, անցումային պետականության կառուցակարգման, տնտեսության սահմանադրականության, Սահմանադրության հիմնադրույթների համարժեք ընկալման ու իրացման, սահմանադրական արդարադատության, մարդու իրավունքների պաշտպանության ներպետական կառուցակարգերի, հանրային իշխանության մարմինների կարգավիճակի և գործունեության կատարելագործման, վարչարարության և վարչական դատավարության, տեղական ինքնակառավարման բարելավման ուղղություններով։

Ամբիոնը, ըստ էության, համահամալսարանական ամբիոն է․ այն ուսումնական գործունեություն է ծավալում նաև ԵՊՀ միջազգային հարաբերությունների, քաղաքագիտության, ժուռնալիստիկայի և տնտեսագիտության ֆակուլտետներում։

Ամբիոնը զգալի աշխատանք է կատարել մայրենի լեզվով ուսումնական գրականության ստեղծման ուղղությամբ։ Մասնավորապես հրատարակվել է «Հայաստանի Հանրապետության սահմանադրական իրավունք», «Վարչական պատասխանատվությունը Հայաստանի Հանրապետությունում» դասագրքերը, «Վարչական իրավունքը ՀՀ իրավական համակարգում» (դասախոսությունների կուրս), «Հայաստանի Հանրապետության վարչական իրավունք», «Մարդու իրավունքներ», «Սահմանադրական վերահսկողություն», «Վարչական վարույթ և դատավարություն», «Մունիցիպալ իրավունք», «Հայաստանի Հանրապետության ֆինանսական իրավունք» ուսումնական ձեռնարկները։

Ամբիոնի անդամները պարբերաբար ելույթ են ունենում միջազգային և հանրապետական գիտաժողովների ու սեմինարների ժամանակ, հրատարակել են մի շարք մենագրություններ և բազմաթիվ գիտական հոդվածներ։ Միաժամանակ՝ մասնակցում են միջազգային գիտակրթական տարբեր հաստատությունների կողմից նախաձեռնվող իրավահամեմատական հետազոտությունների:

Ամբիոնը կատարում է հանրապետությունում ընթացող քաղաքական և իրավական գլոբալ գործընթացների սահմանադրական մշտադիտարկում։

Ամբիոնն իրականացնում է «Մարդու իրավունքներ և սահմանադրական արդարադատություն» մագիստրոսական կրթական ծրագիրը: