Իրավագիտության ֆակուլտետը Երևանի պետական համալսարանի հնագույն ֆակուլտետներից է՝ հարուստ գիտակրթական ավանդույթներով։ Այն ունի 90 տարիների պատմություն. հիմնադրվել է 1933-1934 ուսումնական տարում։

Միջազգային համալսարանական որակավորման վարկանիշով ՀՀ-ում և տարածաշրջանում առաջատար ԵՊՀ իրավագիտության ֆակուլտետը Հայաստանում իրավաբանական բարձրագույն կրթություն ապահովող առավել երկար պատմական ուղի անցած, ամենահեղինակավոր և ճանաչված կենտրոնն է: Անցած 90 տարիների ընթացքում ֆակուլտետը տվել է ավելի քան 25000 շրջանավարտ, որոնք աշխատում են օրենսդիր և գործադիր իշխանության, իրավապահ և դատական համակարգերում, միջազգային կառույցներում ու կազմակերպություններում, փաստաբանական ու խորհրդատվական ընկերություններում, բանկային համակարգում և մասնավոր ընկերություններում, գիտահետազոտական կենտրոններում, հասարակական կազմակերպություններում, իրավաբանական կրթություն առաջարկող բուհերում և այլ կառույցներում:

Ֆակուլտետում գործում է ուսուցման եռաստիճան համակարգ` բակալավրիատ (4 տարի տևողությամբ), մագիստրատուրա (ծրագրով պայմանավորված՝ 1 կամ 1,5 տարի տևողությամբ) և ասպիրանտուրա (3 տարի տևողությամբ):

ԵՊՀ իրավագիտության ֆակուլտետում առաջարկվող դասընթացների շրջանակը տարածաշրջանում անմրցելի է դասընթացների թե՛ խորությամբ, թե՛ բազմազանությամբ և թե՛ արդիականությամբ։ Առարկայական ցանկերը թարմացվում են յուրաքանչյուր տարի՝ դրանք ժամանակակից աշխատաշուկայի պահանջներին առավել համահունչ և այդ պահանջների տեսանկյունից առավել գրավիչ դարձնելու նպատակով:

Բակալավրիատում սովորելիս ուսանողները ձեռք են բերում անհրաժեշտ հիմնարար գիտելիքներ իրավունքի բոլոր ճյուղերի վերաբերյալ, իսկ մագիստրատուրայում ուսումնառությունը նախատեսված է կոնկրետ ոլորտում հիմնարար գիտելիքներ և գործնական հմտություններ ստանալու համար։

ԵՊՀ իրավագիտության ֆակուլտետում դասավանդում են ոլորտի առաջատար մասնագետներ՝ ՀՀ ԳԱԱ ակադեմիկոս, պրոֆեսորներ, գիտությունների դոկտորներ և թեկնածուներ, ՀՀ պետական պարգևների և մասնագիտական ոլորտում պատվավոր կոչմանն արժանացած դասախոսներ: Ֆակուլտետի դասախոսներն ակտիվ մասնակցում են հանրապետությունում ընթացող սահմանադրական և դատաիրավական բարեփոխումների իրականացմանը:

Իրավաբանների ուսուցումն առավել արդյունավետ կազմակերպելու նպատակով ֆակուլտետում ստեղծվել են Կրիմինալիստիկայի ուսումնական կաբինետ, Ուսումնական դատական նիստերի դահլիճ, ինչպես նաև Իրավաբանական կլինիկա (ուսանողական իրավախորհրդատվական ծառայություն): Կլինիկայում ուսանողները դեռևս ուսումնառության ընթացքում հնարավորություն են ունենում փաստաբան դասախոսի ղեկավարությամբ անմիջական իրավաբանական օգնություն ցույց տալու ինչպես քաղաքացիական, քրեական, առևտրային գործերով դիմողներին, այնպես էլ փախստականներին, տեղահանված անձանց և երեխաներին։

Ֆակուլտետում գործում են նաև գիտական մի շարք կենտրոններ` Ա. Իսկոյանի անվան էկոլոգիական իրավունքի գիտաուսումնական կենտրոնը, Ամերիկյան իրավաբանների ընկերակցության գործուն աջակցությամբ ստեղծված Կարիերայի կենտրոնը, որը, հետևելով ամերիկյան իրավաբանական դպրոցների փորձին, ապահովում է ուսանող-շրջանավարտ-գործատու մշտական կապն ու օժանդակում շրջանավարտներին համապատասխան աշխատանք գտնելու հարցում:

Ֆակուլտետում գործում է Իրավական ուսումնասիրությունների կենտրոն, որը ներառում է համակարգչային կենտրոն և էլեկտրոնային գրադարան:

Նյութատեխնիկական բազայի բաղկացուցիչ մաս է նաև փոքր տպարանը, որտեղ հրատարակվում են մասնագիտական ուսումնական ձեռնարկներ, դասախոսության տեքստեր, ուսումնաօժանդակ այլ նյութեր: Ֆակուլտետը հրատարակել է նաև «Իրավագիտության հարցեր» միջազգային գիտական հանդեսը (եռամսյա պարբերականությամբ), որը վերափոխվել է «Բանբեր Երևանի համալսարանի. Իրավագիտություն» հանդեսի, ինչպես նաև հրատարակում է «Պետություն և իրավունք» հանդեսը: Այստեղ հիմնականում տեղ են գտնում ֆակուլտետի պրոֆեսորադասախոսական կազմի և ասպիրանտների գիտական հոդվածները:

ԵՊՀ իրավագիտության ֆակուլտետը՝ որպես ուսումնական հաստատություն և գիտական կենտրոն, արդյունավետ համագործակցում է ինչպես տեղական, այնպես էլ արտասահմանյան գիտահետազոտական հիմնարկների հետ, որոնց թվում են ՀՀ ԳԱԱ փիլիսոփայության, սոցիոլոգիայի և իրավունքի ինստիտուտը, Սահմանադրական իրավունքի կենտրոնը, Ռուսաստանի, Արևմտյան Եվրոպայի, ԱՄՆ-ի, Կանադայի, Ասիայի իրավաբանական առաջատար մի շարք դպրոցներ, որոնք միաժամանակ նաև գիտական խոշոր կենտրոններ են։ Մասնավորապես՝ ֆակուլտետի սաներից շատերը կրթությունը շարունակել են ԱՄՆ-ի Սթենֆորդի, Փենսիլվանիայի, Վաշինգտոնի, Բերկլիի, Ֆրանսիայի՝ Մոնպելիեի, Սորբոնի, Գերմանիայի՝ Հումբոլդտի (Բեռլինի), Բրեմենի, Ֆրայբուրգի, Համբուրգի, Շվեդիայի՝ Ստոկհոլմի, Լունդի, Շվեյցարիայի՝ Ժնևի, Իսպանիայի՝ Բարսելոնայի, Մադրիդի, Մեծ Բրիտանիայի՝ Էսսեքսի, Նոթինգեմի, Սլովենիայի՝ Լյուբլյանայի, Լեհաստանի՝ Բիալիստոկի համալսարաններում, ՌԴ-ի՝ Սանկտ Պետերբուրգի, Մ. Վ. Lոմոնոսովի անվան Մոսկվայի պետական համալսարանում, Մոսկվայի միջազգային հարաբերությունների պետական ինստիտուտում և այլուր:

ՀՀ-ում ԵՊՀ իրավագիտության ֆակուլտետը համագործակցում է ինչպես պետական մարմինների, այնպես էլ պետական և մասնավոր ոլորտի կառույցների հետ, այդ թվում՝ ՀՀ Ազգային ժողով, ՀՀ գլխավոր դատախազություն, ՀՀ ազգային անվտանգության ծառայություն, ՀՀ ոստիկանություն, ՀՀ քննչական կոմիտե, ՀՀ արդարադատության նախարարություն, Հարկադիր կատարումն ապահովող ծառայություն, ՀՀ վճռաբեկ դատարան, ՀՀ վերաքննիչ դատարան, Մարդու իրավունքների պաշտպանի գրասենյակ, ՀՀ փաստաբանների պալատ, ՀՀ կենտրոնական բանկ և այլն:

Գիտաուսումնական և հետազոտական գործունեության իրականացման շրջանակում ԵՊՀ իրավագիտության ֆակուլտետը համագործակցում է նաև միջազգային կառույցների հետ՝ ՀՀ-ում ՄԱԿ-ի գրասենյակ, ԱՄՆ միջազգային զարգացման գործակալություն, Ամերիկյան իրավաբանների ընկերակցություն, «Կոնրադ Ադենաուեր» հիմնադրամի երևանյան գրասենյակ, Կարմիր խաչի երևանյան պատվիրակություն, IRZ,CoE, UNDP, UN, UNICEF, USAID, INL, ICRC և այլն:

ԵՊՀ իրավագիտության ֆակուլտետում լավագույն ուսանողների համար սահմանված են անվանական կրթաթոշակներ՝ Մխիթար Գոշի, Գրիգոր Զոհրապի, Գևորգ Արշակյանի, Յուրի Ղամբարյանցի, Վլադիկ Ներսիսյանցի անվան: Կրթաթոշակներ են սահմանված նաև «Կոնրադ Ադենաուեր» հիմնադրամի կողմից:

Իրավագիտության ֆակուլտետում գործում են գրադարան-ընթերցասրահ, համակարգչային սրահ, որոնք հնարավորություն են ընձեռում ուսանողներին օգտվելու իրավաբանական ոլորտի էլեկտրոնային գրադարաններից և աղբյուրներից: Ուսանողների համար պարբերաբար կազմակերպվում են միջոցառումներ՝ արտասահմանյան առաջատար բուհերի դասախոսների, ՀՀ բարձրաստիճան պաշտոնատար անձանց, միջազգային կառույցների ներկայացուցիչների դասախոսություններ, այցելություններ պետական մարմիններ, դատախաղեր, մրցույթներ, գիտաժողովներ, քննարկումներ:

Իրավագիտության ֆակուլտետն աչքի է ընկնում ուսանողական ակտիվ կյանքով:

Ֆակուլտետի ուսանողական թիմերը ակտիվորեն մասնակցում են ներպետական և միջազգային մի շարք մրցույթների և դատախաղերի՝ արժանանալով տարբեր մրցանակների, մասնավորապես՝ միջազգային՝ Նյուրնբերգյան, Ջեսսափի, Վիլլեմ Ս. Վիս, Ժան Պիկտե, ներպետական՝ միջազգային արբիտրաժ, քրեական իրավունքի և քրեական արդարադատության հիմնախնդիրներին նվիրված դատախաղին և այլն:

Ուսանողական խորհրդի և Ուսանողական գիտական ընկերության ջանքերով կազմակերպվում են ինչպես գիտական (գիտաժողովներ, թեմատիկ քննարկումներ, հանդիպումներ պետական տարբեր կառույցների ղեկավարների հետ, մասնակցություն մասնագիտական մրցույթների և այլն), այնպես էլ մշակութային բազմաթիվ միջոցառումներ: