![](/sites/default/files/styles/large_half_text/public/2024-04/436345016_738144095184136_3312994406904325957_n.jpg?itok=fWQ8j7sJ)
ԵՊՀ իրավագիտության ֆակուլտետի դասախոս, իրավաբանական գիտությունների թեկնածու, Էդինբուրգի համալսարանի իրավունքի մագիստրոս Առնոլդ Վարդանյանը հրավիրված էր զեկուցմամբ հանդես գալու Քեմբրիջի համալսարանի իրավունքի ֆակուլտետի` 2024 թվականի ապրիլի 8-9-ը կազմակերպած միջազգային իրավունքի հեղինակավոր կոնֆերանսում։
Միջազգային իրավունքում խաղաղության և կայունության հատման վերաբերյալ զեկուցման ընթացքում Առնոլդ Վարդանյանը ներկայացրել է Լեռնային Ղարաբաղի հակամարտության նախապատմությունը, վերջին տասնամյակների ընթացքում հակամարտության խաղաղ կարգավորման չհաջողված փորձը, ներկայում առկա խոչընդոտները տարածաշրջանում խաղաղության և կայունության հաստատման ուղղությամբ։ Միաժամանակ անդրադարձ է կատարվել նաև խաղաղության պայմանագրերի կնքման միջազգային փորձին, որն Էդինբուրգի համալսարանում ուսումնասիրել է Առնոլդ Վարդանյանը։
![](/sites/default/files/styles/large_half_text/public/2024-04/436422041_738143991850813_5799758967108019334_n.jpg?itok=sXkPPauV)
Քեմբրիջի համալսարանի իրավունքի ֆակուլտետն այս տարվա սկզբին ամբողջ աշխարհի գիտնականների կողմից ներկայացված մոտ 230 գիտական հետազոտության հայտերից մրցութային հիմունքով ընտրել է Առնոլդ Վարդանյանի զեկուցումը։
Մինչ կոնֆերանսը՝ Առնոլդ Վարդանյանի զեկուցման հակիրճ բովանդակությունը հրապարակվել է Քեմբրիջի համալսարանի միջազգային իրավունքի բլոգում։ Նախատեսվում է կոնֆերանսի արդյունքում զեկուցման թեմայով պատրաստվող հետազոտությունը տպագրության ներկայացնել Քեմբրիջի համալսարանի միջազգային իրավունքի ամսագրում։
Այս կոնֆերանսին մասնակցության համար Առնոլդ Վարդանյանը նաև արժանացել է «Հ. Հովնանիան» ընտանեկան հիմնադրամի կրթաթոշակի։