ԵՊՀ-ում շրջայց է կատարել մշտադիտարկող պատվիրակությունը

Համաշխարհային բանկի և «Կրթական ծրագրերի կենտրոն» ծրագրերի իրականացման գրասենյակի ներկայացուցիչներն այցելել են ԵՊՀ և ծանոթացել Մանրէաբանական կենսատեխնոլոգիաների և կենսավառելիքի նորարարական ու Դեղերի որակի հսկման և մոնիթորինգի գիտաուսումնական կենտրոնների գործունեության ուղղություններին, իրականացվող ծրագրերին ու հետազոտական նախագծերին։

Վերոնշյալ կենտրոնները ստեղծվել են «Կրթական ծրագրերի կենտրոն» ԾԻԳ-ի աջակցությամբ և Համաշխարհային բանկի համաֆինանսավորմամբ իրականացվող «Կրթության բարելավում» վարկային ծրագրի Նորարարությունների մրցակցային հիմնադրամի (ՆՄՀ) շրջանակում։

ՀԲ-ի և «Կրթական ծրագրերի կենտրոն» ԾԻԳ-ի ներկայացուցիչները եղել են նաև Ֆիզիկայի ինստիտուտում, որտեղ Համաշխարհային բանկի համաֆինանսավորմամբ և «Կրթական ծրագրերի կենտրոն» ԾԻԳ-ի աջակցությամբ իրականացվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակում ստեղծվում է «Օպտիկական միկրոհամակարգերի մշակման և հետազոտման գիտակրթական կենտրոն»։

Մշտադիտարկող պատվիրակությունը եղել է բուհի կողմից կենտրոնի համար նախատեսված տարածքում, ծանոթացել ծրագրով ձեռք բերված լաբորատոր գերժամանակակից սարքավորումներին ու ընթացիկ աշխատանքներին: