Նկարներ ու գույներ ԵՊՀ-ում. Մայրության և գեղեցկության տոնին նվիրված «Art-wine» միջոցառում

ԵՊՀ կենտրոնական մասնաշենքի նախասրահում անցկացվեց Մայրության և գեղեցկության տոնին նվիրված «Art-wine» միջոցառումը, որի ժամանակ ԵՊՀ կին աշխատակիցները հնարավորություն ունեցան աշխատանքային օրն ընդմիջելու արվեստով։

Կանայք ակտիվորեն ներգրավված են կրթական, գիտական, մշակութային և այլ ոլորտներում: ԵՊՀ-ում ևս մեծ է կին աշխատակիցների ավանդը գիտակրթական գործընթացի կայուն զարգացման գործում։

Գնահատելով գիտակրթական կյանքի զարգացմանն ուղղված կին աշխատակիցների ներդրումն ու կարևորությունը՝ ԵՊՀ անձնակազմի կառավարման բաժնի ջանքերով կազմակերպվեց միջոցառումը, որը նպատակ ուներ արվեստի շուրջ համախմբելու կին աշխատակիցներին՝ օրը դարձնելով հիշարժան ու տարբերվող:

Հաճելի մթնոլորտում բարձր տրամադրությամբ և դրական հույզերով աշխատակիցները կտավի վրա պատկերեցին բնանկարներ։ Մասնագիտական խորհուրդներով աշխատակիցներին աջակցեցին և նկարչական հմտություններ փոխանցեցին Հայաստանի գեղարվեստի պետական ակադեմիայի սաները։ Նկարելու գործընթացն ուղեկցվեց հյուրասիրությամբ։

ԵՊՀ աշխատակիցներից Ալվինա Կոստանյանը նշեց, որ նման միջոցառումները հիանալի հնարավորություն են գործընկերների հետ հաճելի ժամանակ անցկացնելու և սիրելի զբաղմունքները զարգացնելու համար՝ բացահայտելով նոր հմտություններ:

«Միշտ երազել եմ նկարելու մասին, բայց թվացել է, թե չեմ կարողանում: Նկարելու երազանքս այսօր իրականացավ, և հասկացա, որ ստացվում է: Հույզերս աննկարագրելի են»,- պատմեց Ալվինան:

Աշխատակից Աննա Աղուզումցյանը նշեց, որ յուրահատուկ ձևաչափով կազմակերպված նմանօրինակ միջոցառումները մոտիվացնող են և սպասված:

Միջոցառման ավարտին ԵՊՀ աշխատակիցները վերցրին իրենց պատկերած կտավները՝ որպես միջոցառման՝ արվեստի հետ հաղորդակցվելու օրվա հուշ-խորհրդանիշ։