«ԱՆԳԼԻՑԻԶՄՆԵՐՆ ԱՄԵՆՈՒՐ ԵՆ, ԱՅԴ ԹՎՈՒՄ՝ ՆԱԵՎ ՀԱՅԵՐԵՆՈՒՄ». ՎՈԼՖԳԱՆԳ ՔՐԻԳԵՐ

Վոլֆգանգ Քրիգերը նախ ողջունեց թեմայով հետաքրքրված ուսանողներին և դասախոսներին, ապա ներկայացրեց, թե ինչի մասին է դասախոսությունը:

«Հարկ է նշել, որ այսօրվա իմ դասախոսության թեման բավականին արդիական է և հաճախ է քննարկվում հատկապես լեզվաբանների կողմից,- փաստեց բանախոսը,- անգլիցիզմները չեն շրջանցել գերմաներենը, և ես նկատել եմ, որ հայերենը նույնպես զերծ չի մնացել դրանցից»:

Դասախոսության սկզբում Վոլֆգանգ Քրիգերը սահմանեց անգլիցիզմը՝ նշելով, որ լեզվի մեջ անգլիցիզմ է կոչվում այն երևույթը, երբ անգլերեն բառերը փոխակերպվում են տվյալ լեզվի բառերի, կոնկրետ այս դեպքում՝ գերմաներենի:

«Մենք կարող ենք առօրյայում նմանատիպ շատ օրինակների հանդիպել, երբ անգլիցիզմներն օգտագործվում են ամենատարբեր ոլորտներում նույնիսկ այն դեպքում, երբ ունեն գերմաներեն համարժեքները»,- նշեց գերմանացի մասնագետը՝ հավելելով, որ անգլիցիզմների կիրառման ոլորտները շատ տարբեր են՝ սկսած գովազդային վահանակներից, վերջացրած գիտական և քաղաքական ոլորտներով:

Վոլֆգանգ Քրիգերի համոզմամբ, անգլիցիզմները երկար ճանապարհ են անցնում նախքան որևէ լեզվին ինտեգրվելը:

«Մենք գիտենք, որ անգլերենը սեռ չունի, մինչդեռ գերմաներենը երեք սեռ ունի, գոյականների հատուկ գրություն, անորոշ բայերի վերջավորություն, այդ իսկ պատճառով անգլերեն բառերը երկար ճանապարհ են անցնում նախքան գերմաներենի բառապաշար մտնելը»,- ասաց բանախոսը:

Այնուամենայնիվ, լեզվաբանների կարծիքն անգլիցիզմների մասին միանշանակ չէ, քանի որ երբեմն շատ դժվար է ասել, թե տվյալ բառը կոնկրետ որ լեզվից է ծագել:

«Երբեմն բառի ծագումը շատ դժվար է որոշել, քանի որ հստակ չես կարող ասել՝ այդ բառն առաջացել է անգլերենից, ֆրանսերենից, թե լատիներենից»,- փաստեց Վոլֆգանգ Քրիգերը:

Հանդիպման վերջում ուսանողներն իրենց հուզող հարցերն ուղղեցին բանախոսին:

Անի Պողոսյան