ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ՝ ՉԻՆԱՍՏԱՆԻ ՆԱՆԿԻՆԻ ՆՈՐՄԱԼ ՀԱՄԱԼՍԱՐԱՆԻ ՀԵՏ

Հանդիպմանը ներկա էին ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, Միջազգային համագործակցության վարչության պետ Ալեքսանդր Մարգարովը, Կենսաբանության ֆակուլտետի դեկան Էմիլ Գևորգյանը, Կիրառական կենսաբանության գերազանցության կենտրոնի ղեկավար Նելլի Հովհաննիսյանը:

Չինաստանի Նանկինի նորմալ համալսարանի պատվիրակությունը գլխավորում էր համալսարանի նախագահ, պրոֆեսոր Չեն Գուոքսիանգը:

Հանդիպման սկզբում Գեղամ Գևորգյանը պատվիրակությանը ներկայացրեց ԵՊՀ-ի կառուցվածքը, լաբորատորիաներն ու ինստիտուտները, գործունեության ոլորտները և իրականացվող աշխատանքները՝ նշելով, որ այն ամենամեծ և ամենահին համալսարանն է Հայաստանում:

«Այս տարի մեզ համար հոբելյանական էր, քանի որ Երևանի պետական համալսարանը նշում էր հիմնադրման հարյուրամյակը,- շեշտեց Գեղամ Գևորգյանը,- արդեն հարյուր տարի է, ինչ բուհը գիտական գործունեություն է ծավալում, և մեր կարևոր նպատակներից է նաև միջազգային համագործակցության հաստատումը տարբեր երկրների համալսարանների հետ»:

Գեղամ Գևորգյանը պատրաստակամություն հայտնեց տարբեր ծրագրերի շրջանակում համագործակցելու Նանկինի նորմալ համալսարանի հետ:

Նանկինի նորմալ համալսարանի նախագահ, պրոֆեսոր Չեն Գուոքսիանգը նախ շնորհակալություն հայտնեց հյուրընկալության համար, ապա նշեց, որ Հայաստան այցելությունը բավականին տպավորիչ է եղել:

«Ինձ համար շատ մեծ պատիվ է հյուրընկալվել ԵՊՀ-ում՝ հատկապես հիմնադրման հարյուրամյակի շրջանակում,- փաստեց պատվիրակության ղեկավարը,- պետք է նշեմ նաև, որ բավականին տպավորված եմ նաև մայրաքաղաք Երևանի գեղեցկությամբ և մշակութային արժեքներով»:

Այնուհետև պարոն Չեն Գուոքսիանգը ներկայացրեց Նանկինի նորմալ համալսարանի հիմնադրման պատմությունն ու միջազգային համագործակցության փորձը:

Վերջինիս խոսքով, համալսարանն ակտիվորեն համագործակցում է տարբեր երկրների համալսարանների հետ, և պատրաստակամություն հայտնեց համագործակցելու ԵՊՀ-ի հետ փոխանակման տարբեր ծրագրերով՝ փաստելով, որ շատ ուրախ կլինեն Հայաստանից ուսանողներ ընդունել, որոնք կսովորեն չինարեն և կիրականացնեն իրենց գիտական հետազոտությունները Նանկինի նորմալ համալսարանում:

Արթուր Իսրայելյանը ներկայացրեց ԵՊՀ-ում գործող Չինագիտության կենտրոնը:

Կիրառական կենսաբանության գերազանցության կենտրոնի ղեկավար Նելլի Հովհաննիսյանն էլ պատվիրակության անդամներին պատմեց իր ղեկավարած կենտրոնի կողմից իրականացված միջազգային ծրագրերի մասին:

Հանդիպման վերջում կողմերի միջև ստորագրվեց համագործակցության հուշագիր: