ԴԵՂԱՊԱՏՐԱՍՏՈՒԿՆԵՐԻ ՈՐԱԿԻ ՀՍԿՄԱՆ ԵՎ ՄՈՆԻՏՈՐԻՆԳԻ ԳԻՏԱՈՒՍՈՒՄՆԱԿԱՆ ԿԵՆՏՐՈՆԻ ՍՏԵՂԾՈՒՄ ՈՒ ՆՈՐ ՄԱԳԻՍՏՐՈՍԱԿԱՆ ԾՐԱԳՐԻ ԲԱՑՈՒՄ ԵՊՀ ՖԱՐՄԱՑԻԱՅԻ ԻՆՍՏԻՏՈՒՏՈՒՄ

Ծրագրի գերագույն նպատակն է միջազգային չափորոշիչներին համահունչ դեղագետ-վերլուծաբան (անալիտիկ) մասնագետների պատրաստումը, ինչը նախատեսում է ԵՊՀ ֆարմացիայի ինստիտուտում ժամանակակից վերլուծական սարքավորումներով համալրված գիտաուսումնական լաբորատորիայի ստեղծում և դրա հենքի վրա դեղանյութերի կառուցվածքային հետազոտությունների և դեղերի որակի հսկման ու գնահատման նոր մագիստրոսական ծրագրի բացում:

Ծրագրի մտահղացման, անհրաժեշտության և  հեռանկարների մասին ysu.am-ը զրուցել է ծրագրի ղեկավար, ԵՊՀ ֆարմացիայի ինստիտուտի տնօրենի պաշտոնակատար, ՀՀ ԳԱԱ ակադեմիկոս ԱշոտՍաղյանի հետ:

Վերջինս պարզաբանեց, որ իրենք հանրապետության դեղարտադրող ընկերություններից, դեղգործակալություններից, Դեղերի և բժշկական տեխնոլոգիաների փորձագիտական կենտրոնից և այլ կազմակերպություններից պարբերաբար ստանում են  տեղեկատվություն դեղաշուկայում առկա դեղագետ-վերլուծաբան մասնագետների մեծ պահանջարկի վերաբերյալ, ինչից և բխում է վերոնշյալ գիտաուսումնական կենտրոնի ստեղծման և մագիստրոսական ծրագրի բացման անհրաժեշտությունը:

«Մեզ անհրաժեշտ են դեղագետ-վերլուծաբաններ, որոնք կկարողանան ժամանակակից մեթոդների կիրառմամբ զբաղվել դեղերի որակի հետազոտմամբ, գնահատմամբ և մոնիտորինգի հիմնահարցերով»,- ընդգծեց Ա. Սաղյանը:

Նա նշեց, որ Հայաստանում դեղերի հետազոտմամբ և մոնիտորինգով զբաղվում է միայն Դեղերի և բժշկական տեխնոլոգիաների փորձագիտական կենտրոնը. «Այս ամենն ինչ-որ չափով հակասում է մենաշնորհության մասին ՀՀ  օրենքին, քանի որ անհրաժեշտ են այլընտրանքային կառույցներ կամ կազմակերպություններ, որոնք նույնպես կզբաղվեն նշված գործառույթներով»: 

ԱշոտՍաղյանը ներկայացրեց կենտրոնի ստեղծման փուլերը, որոնց կհաջորդեն մագիստրոսական ծրագրի բացումն ու ուսանողների ընդունելության կազմակերպումը. «Նախատեսվում է ձեռք բերել 6 նոր ժամանակակից սպեկտրադիտական սարքավորումներ և դրանք համալրել արդեն առկա  4  սարքավորումներով, ԵՊՀ ֆարմացիայի ինստիտուտում ստեղծել միջազգային պահանջներին համապատասխան գիտաուսումնական վերլուծական լաբորատորիա, որտեղ կներդրվեն ֆիզիկաքիմիական անալիզի ժամանակակից մեթոդներ, և կիրականացվեն դեղանյութերի ու դրանց բաղադրիչների կառուցվածքային հետազոտություններ, հանրապետությունում արտադրվող և ներկրվող դեղապատրաստուկների որակի հսկման ու գնահատման  գործառույթներ»:

Ա. Սաղյանից հետաքրքրվեցինք՝ երբ են ավարտվելու լաբորատորիայի ստեղծման աշխատանքները, և արդյոք մասնագետները լինելու են Ֆարմացիայի ինստիտուտից:

«Գնումների գործընթացն արդեն մեկնարկել է, կատարվելու են վերանորոգման և վերակառուցման աշխատանքներ, որից հետո լաբորատորիան համալրվելու է անհրաժեշտ կահույքով: Ծրագիրը նախատեսված է իրականացնել 18 ամսվա ընթացքում, այսինքն՝ լաբորատորիայի կազմավորման աշխատանքներն կավարտվեն 2020 թվականի փետրվարին, այնուհետև կստեղծվի գիտաուսումնական կենտրոն, իսկ 2021 թ.-ից կգործի նոր մագիստրոսական ծրագիրը՝ «Դեղագետ- վերլուծաբան» մասնագիտացմամբ»,- պարզաբանեց վերջինս:

Նրա տեղեկացմամբ, մասնագետների գերակշռող մասը լինելու է ԵՊՀ ֆարմացիայի ինստիտուտից, որոնք լրացուցիչ վերապատրաստվելու են, բացի դրանից՝ գործուղումներ են նախատեսված օտարերկրյա բարձրակարգ դեղագործական ընկերություններ ու գիտական լաբորատորիաներ:

Անդրադառնալով ուսանողների ներգրավվածությանըմագիստրոսական նոր ծրագրին՝  ԵՊՀ ինստիտուտի տնօրենի պաշտոնակատարը նշեց, որ «Ֆարմացիա» մասնագիտությամբ  մագիստրատուրա ընդունված առավել բարձր ՄՈԳ ունեցող ուսանողները սովորելու են հենց այս ծրագրով:

Ա. Սաղյանը նշեց նաև, որ նախատեսվում է համապատասխան արտոնագրի (լիցենզիայի) ստացում՝ ձեռնարկատիրական գործունեություն ծավալելու նպատակով. «Ես համոզված եմ, որ ծրագիրն իրագործելու դեպքում կենտրոնն աստիճանաբար վերածվելու   է ինքնաֆինանսավորվող կառույցի,  այն դառնալու է ԵՊՀ լավագույն գիտակրթական կենտրոններից մեկը և, իհարկե, պատրաստելու է միջազգային չափորոշիչներին համապատասխան  բարձրակարգ դեղագետ-վերլուծաբաններ, որոնք համալրելու են ինչպես հայկական, այնպես էլ օտարերկրյա աշխատաշուկան»,- ամփոփեց Ա. Սաղյանը:

Պատրաստեց Անգին Խաչատրյանը