ԵՊՀ ՈՒՍԱՆՈՂՆԵՐԸ ԹԱՐԳՄԱՆԱԿԱՆ ՏԵՍՈՒԹՅՈՒՆԸ ՀԱՄԱՏԵՂԵԼՈՒ ԵՆ ԳՈՐԾՆԱԿԱՆ ՊԱՐԱՊՄՈՒՆՔՆԵՐԻ ՀԵՏ

Բացման արարողությանը ներկա էին ԵՊՀ ռեկտոր Արամ Սիմոնյանը, պրոռեկտորներ Գեղամ Գևորգյանն ու Ալեքսանդր Գրիգորյանը, Ռոմանագերմանական բանասիրության ֆակուլտետի դեկան Սամվել Աբրահամյանը, Թարգմանության տեսության և պրակտիկայի ամբիոնի վարիչ Ռուզան Ղազարյանը, ուսանողներ:

Արամ Սիմոնյանը բացման խոսքում կարևորեց  համաժամանակյա (սինքրոն) թարգմանության նոր լսարանների բացումը:

«Ռոմանագերմանական ֆակուլտետի, ինչպես նաև համալսարանի համար նմանօրինակ լսարանների բացումը  շատ կարևոր է,- նշեց Արամ Սիմոնյանը,- այս ամբողջ ընթացքում մեր հիմնական մարտահրավերներից մեկը եղել է այն, որ հնարավորություն չենք ունեցել ամբողջությամբ  դրսևորվելու մեր թարգմանական ներուժը: Համաժամանակյա  թարգմանության լսարանների բացումը մի համեստ քայլ է իրավիճակը շտկելու, թարգմանչական նոր կադրեր պատրաստելու ուղղությամբ»:

Արամ Սիմոնյանն ավելացրեց , որ համալսարանը հատուկ դեր ունի միջմշակութային ու միջլեզվական շփումներն ապահովելու գործընթացում,  և  այսօրվանից  հիմք է ստեղծում   որակյալ կադրերի ստեղծման համար:

«Ես լիահույս եմ, որ այս երկու լսարանները մեզ հնարավորություն կտան վերականգնելու  մեր թարգմանական դպրոցի ավանդույթները, և համոզված եմ, որ կգա մի օր, երբ մեր ուսանողները մեծ ներդրում կունենան մշակութային արժեքների ստեղծման և փոխանցման գործում»,-ավելացրեց Արամ Սիմոնյանը:

Թարգմանության տեսության և պրակտիկայի ամբիոնի վարիչ Ռուզան Ղազարյանը նախ  շնորհակալություն հայտնեց  ներկաներին լսարանների բացմանը մասնակցելու համար, ապա ավելացրեց,  որ այսօր չափազանց կարևոր օր է բուհի, ամբիոնի և ուսանողների համար:

«Առաջին անգամ է, երբ բուհը, կարևորելով լեզվի դասավանդման  ժամանակակից մեթոդները,  ստեղծել է այս երկու լսարանը՝ բացարձակապես սեփական միջոցներով: Այստեղ մեծ է ԵՊՀ ռեկտոր Արամ Սիմոնյանի դերը: Լեզվական ֆակուլտետներում նմանօրինակ որակյալ տեխնիկայով հագեցած լսարանների առկայությունը ժամանակի պահանջ է»:

Տիկին Ղազարյանն իր խոսքում  կարևորեց  ուսանողների մտավոր ներուժի և բուհի տեխնիկական տվյալների համապատասխանեցումը. «Օտարերկրյա  ուսանողների հետ շփման  փորձն ինձ թույլ է տալիս ասելու, որ մեր ուսանողները ոչնչով չեն զիջում արտասահմանցի ուսանողներին: Խնդիրը տեխնիկական հնարավորությունների մեջ է»:

Շնորհակալ էին նաև ուսանողները, քանի որ նրանք այսուհետ թարգմանչության մասին տեսական գիտելիքները համատեղելու են գործնական պարապմունքների հետ:  

Անի Պողոսյան