ԵՊՀ եվրոպական լեզուների և հաղորդակցության ֆակուլտետի անգլիական բանասիրության ամբիոնի ասիստենտ Գոհար Մադոյանը նոյեմբերի 9-18-ը մասնակցել է Բելգիայի Լյուվենի կաթոլիկ համալսարանում անցկացվող «Ակտիվ ուսուցում» («Active Learning») խորագրով դասախոսների վերապատրաստման դասընթացին և ստացած նոր գիտելիքները փոխանցել գործընկերներին:
Ինչպես մեզ հետ զրույցում պատմեց Գոհար Մադոյանը, «Ակտիվ ուսուցում» վերապատրաստման դասընթացի ժամանակ մասնակիցները հնարավորություն են ունեցել ծանոթանալու ակտիվ ուսուցման մեթոդաբանությանը, ինչպես նաև համացանցային, թվային կամ տեղեկատվական տարբեր տեխնոլոգիաների կիրառմանը լսարանում։ Դասընթացը վարել է ճարտարագիտության ֆակուլտետի պրոֆեսոր Վիմ Վան Պետեգեմը։
«Դասընթացի ծրագիրը կազմված էր հենց ակտիվ ուսուցման մեթոդների կիրառմամբ: Դասընթացի մեծ մասն անցկացնում էր ոչ թե դասախոսը, այլ մենք՝ մասնակիցներս: Մեզ տալիս էին անհատական ու խմբային հանձնարարություններ և գործնականում սովորեցնում, թե ինչպես պետք է ներգրավենք ուսանողներին»,- ասաց Գոհար Մադոյանը:
Նրա փոխանցմամբ՝ դասընթացի պահանջներից մեկը ենթադրում էր, որ վերապատրաստված դասախոսը պետք է վերադառնա իր բուհ և ստացած նոր գիտելիքները փոխանցի գործընկերներին։
«Այստեղ կազմակերպեցինք «Ակտիվ ուսուցումը բարձրագույն ուսումնական հաստատություններում» խորագրով 5-օրյա վերապատրաստման դասընթաց, որին մասնակցեց 16 դասախոս»,- հավելեց նա:
Գոհար Մադոյանի հավաստմամբ՝ օտար լեզուների դասավանդման դեպքում միշտ էլ կիրառվել են ակտիվ ուսուցման մեթոդներ, քանի որ առանց ուսանողների ակտիվ մասնակցության ուղղակի հնարավոր չէ արդյունքի հասնել։
«Իհարկե, կան մեթոդներ ու եղանակներ, որոնք նորամուծություն էին և հաջողությամբ ներդրվեցին, սակայն արդյունավետության համար մեզ պակասում է տեխնիկական այն հագեցվածությունը, որն առկա էր Լյուվենի կաթոլիկ համալսարանում։ Ճիշտ է, ունենք լսարաններ, որոնցում առկա են համապատասխան տեխնոլոգիաներ, բայց գաղափարը ներդնելու, ամբողջ մեթոդաբանությունը կիրառելու համար անհրաժեշտ է հավասարաչափ բաշխվածություն»,- մատնանշեց Գ․ Մադոյանը:
Նրա կարծիքով բավականին արդյունավետ է այն մեթոդի կիրառումը, երբ ուսանողները նախապես են ծանոթանում նյութին, իսկ լսարանում արդեն դասախոսի հետ քննարկում այն։
«Այդ եղանակով ստացած տեղեկությունն արդեն ավելի դյուրին է ընկալվում, ուսանողներն ակտիվ մասնակցությունն են ունենում»,- ասաց նա:
Գոհար Մադոյանը մեզ հետ զրույցում փաստեց, որ վերապատրաստմանը մասնակցած գործընկերները բավականին ոգևորված են եղել և ակտիվ մասնակցություն ցուցաբերել։
«Հետաքրքիր քննարկումներ ծավալվեցին: Ես դասընթացը կազմակերպել էի տեղայնացված, այսինքն՝ հարմարեցված մեր ֆակուլտետում կազմակերպվող ուսումնական գործընթացին, նշել էի, թե որ առարկայի դեպքում ինչ մեթոդ է նպատակահարմար կիրառել: Բացի դրանից՝ մեր դասախոսները նույնպես գործնական աշխատանքներ կատարեցին»,- պատմեց Գ․ Մադոյանը:
Գոհար Մադոյանը հավելեց, որ գործընկերների հետ քննարկում են, թե ինչ եղանակներով է հնարավոր ներդնել մեթոդներն ուսումնական գործընթացում, որպեսզի դրանք լինեն շարունակական և ունենան առավել լայն ընդգրկում:
