«ԱՅՍ ՀԱՆՐԱԿԱՑԱՐԱՆԻ ԿԱՌՈՒՑՈՒՄՆ ԻՍԿԱԿԱՆ ՆՎԵՐ Է ՄԵՐ ՈՒՍԱՆՈՂՆԵՐԻՆ՝ ԻՐԵՆՑ ՄԻՋԱԶԳԱՅԻՆ ՕՐՎԱ ԿԱՊԱԿՑՈՒԹՅԱՄԲ». ԵՊՀ ՌԵԿՏՈՐ ԱՐԱՄ ՍԻՄՈՆՅԱՆ

Հանրակացարանի վերանորոգումը կատարվել է ամերիկահայ բարերար Գուրգեն  Ասատուրյանի՝ համալսարանին կտակված գումարի և ԵՊՀ-ի  միջոցների հաշվին:

Բացման արարողությանը ներկա էին ԵՊՀ ռեկտոր Արամ Սիմոնյանը, ԵՊՀ վարչական և դասախոսական կազմի ներկայացուցիչներ, ուսանողներ և հյուրեր:

Բացման և բարի գալուստի խոսքում ԵՊՀ ռեկտոր Արամ Սիմոնյանը նշեց, որ հանրակացարանի բացումը չափազանց կարևոր իրադարձություն է համալսարանի համար:

«Հանրակացարանն իր բոլոր հարմարավետություններով ծառայելու է, որ ուսանողը կարողանա թե՛ իր ուսման գործընթացը,  թե՛ իր կենցաղը ճիշտ կազմակերպել: Այս հանրակացարանի  կառուցումն իսկական նվեր է մեր ուսանողներին՝ իրենց միջազգային օրվա կապակցությամբ»:

300-500 ուսանողի համար նախատեսված նոր հանրակացարանային համալիրը հնարավորություն է ընձեռում անհոգ և հարմարավետ կազմակերպելու ուսանողական կյանքը: 

Մեզ հետ զրույցում ԵՊՀ գիտական քարտուղար Մենուա Սողոմոնյանը նշեց, որ նմանօրինակ հանրակացարանը շատ մեծ նշանակություն ունի համալսարանական կյանքը ամբողջականացնելու գործում:

«Մենք հույս ունենք, որ այս հանրակացարանում իրենց հարմարավետությունը գտնելու են նաև այն արտասահմանցի ուսանողները, որոնք կցանկանան կրթություն ստանալ ԵՊՀ-ում,- ասաց Մենուա Սողոմոնյանը,- հանրակացարանի կառուցումը  կարևոր է մեր բուհի միջազգայնացման գործընթացի համար, քանի որ շատ հաճախ ծրագրային փաթեթներ ներկայացնելիս մենք ունենում էինք խնդիրներ՝  կապված ուսանողների մնալու վայրի հետ»:

ԵՊՀ հանրակացարանային համալիրի տնօրեն Լեոնարդ Շեկյանը նշեց, որ այսուհետ ուսանողները բարեկեցիկ հանրակացարանում են ապրելու, ինչի կարիքը շատ կար: 

«Մենք փորձել ենք հնարավորինս ամեն ինչ անել, որ ուսանողներն այս համալիրում ունենան անհրաժեշտ բոլոր պայմաններն իրենց կարիքները հոգալու համար: Շենքում կան գրադարան, ընթերցասրահ, սննդի կետ: Յուրաքանչյուր հարկ ունի իր խոհանոցն ու սանհանգույցը: Ուսանողներն ունեն նաև լվացքատուն »,- ասաց ԵՊՀ հանրակացարանային համալիրի տնօրենը:

Լեոնարդ Շեկյանի խոսքով, տարածքի բարեկարգման աշխատանքները դեռ շարունակվելու են. նախատեսվում է ավելացնել նաև կանաչ տարածությունը:

Անի Պողոսյան