Ֆրանսիական բանասիրության ամբիոն

Ֆրանսիական բանասիրության ամբիոնն անցել է զարգացման կարճ, սակայն արգասավոր ուղի` բանասիրության ֆակուլտետի ենթաբաժնից դառնալով ԵՊՀ կարևորագույն ամբիոններից մեկը: Այն ստեղծվել է 2009-2010 ուստարում` անջատվելով ռոմանական բանասիրության ամբիոնից: Լինելով նորաստեղծ ամբիոն, սակայն անցյալում ունենալով մեծ նվաճումներ՝ ֆրանսիական բանասիրության ամբիոնը շարունակում է իր ավանդական գործունեությունը` պատրաստելով որակյալ մասնագետներ, որոնք այսօր աշխատում են ՀՀ կառավարությունում, նախարարություններում, պետական և մասնավոր ձեռնարկություններում, հանրապետության կրթօջախներում:

Ֆրանսիական բանասիրության ամբիոնը նախ ղեկավարել է բանասիրական գիտությունների թեկնածու, դոցենտ Զավեն Հարությունյանը, իսկ այժմ այն ղեկավարում է բանասիրական գիտությունների թեկնածու, դոցենտ Գայանե Սարգսյանը:

Ֆրանսիական բանասիրության ամբիոնն ունի գիտական մեծ ներուժ, որի վկայությունն են մեր դասախոսների հեղինակած մենագրությունները, դասագրքերը, մեթոդական ձեռնարկներն ու բառարանները:

Հիշատակելի են Թ. Բլբուլյանի՝ նոբելյան մրցանակակիր Գ.Ժ.Մ. «Արձանագրությունը» վեպի թարգմանությունը, Լ. Վարդանյանի «Manuel de français» ուսումնական ձեռնարկը, Զ. Հարությունյանի «Լեզվի խոսքայնացումը և հոլովական իմաստները», Ս. Խաչատրյանի «Մարդու իրավունքները միջազգային փաստաթղթերում», Ա. Ղարիբյանի և Մ. Ջուլհակյանի կազմած «Ֆրանսերենի ընթերցանության ձեռնարկը» և «Ֆրանսիայի պատմության և երկրագիտության ձեռնարկը», Թ. Բլբուլյանի և Հ. Ավետիսյանի լրամշակած և խմբագրած՝ ֆրանսերենի դասագրքերի հայերեն տարբերակները (հանրակրթական դպրոցների 5-ից 9-րդ դասարաններ), Թ. Բլբուլյանի «Ֆրանսերեն լեզվի արտասանական-ուղղախոսական ուղեցույցը», Գ. Սարգսյանի «Թարգմանություն և թարգմանաբանություն» ձեռնարկը, «Ֆրանսերենի դասագիրք»-ը, Շ. Թամրազյանի «Les visages de l’art dans la littérature française (XVII- XXI  siècles)», Լ. Վարդանյանի «Manuel de français (Le vocabulaire à travers l’art)» և այլ աշխատություններ: 2009 թ. լույս է տեսել նախադեպը չունեցող «Ֆրանսերեն-հայերեն» մեծ բառարանը` Ա. Մուրադյանի ընդհանուր խմբագրությամբ:

Ֆրանսիական բանասիրության ամբիոնի գործունեության կարևորագույն ոլորտներից են նաև թարգմանությունն ու թարգմանագիտությունը: Ամբիոնի դասախոսների ջանքերով հայերեն են թարգմանվել ֆրանսիական գեղարվեստական, ինչպես նաև լեզվաբանական գրականության դասական և ժամանակակից բազմաթիվ երկեր:

Ամբիոնն զբաղվում է Երևանի պետական համալսարանում ֆրանսերենի դասավանդման մեթոդական և կազմակերպական խնդիրներով, այդ թվում՝ առարկայական ուսումնական ծրագրերի վերանայում և վերախմբագրում, երիտասարդ դասախոսների մասնագիտական որակի բարձրացում: Ուսումնամեթոդական աշխատանքներ են ծավալվել նաև ԵՊՀ Իջևանի մասնաճյուղում:

Ֆրանսիական բանասիրության ամբիոնը սերտ համագործակցում է Ֆրանսիայի Մոնպելիեի 3, Պոլ Վալերի, Լիլի և Էքս Մարսելի համալսարանների հետ:

2022 թ. ֆրանսիական բանասիրության ամբիոնի և Ֆրանսիայի Լիլի համալսարանի միջև ձեռք է բերվել համաձայնություն «Միջազգային և գործարար հաղորդակցություն» մագիստրոսական կրթական նոր ծրագրի վերաբերյալ: Ծրագիրն իրականացվելու է Լիլի համալսարանի հետ համատեղ` կրկնակի դիպլոմի տրամադրմամբ:

Ֆրանսիական բանասիրության ամբիոնը նաև կազմակերպում է միջազգային գիտաժողովներ: Հիշատակության արժանի է 2022 թ․ Ֆրանկոֆոնիայի երկամսյակի շրջանակում տեղի ունեցած ֆրանսիական բանասիրության ամբիոնի և Ֆրանսիայի Լիլի համալսարանի համատեղ կազմակերպած «Խոսույթը գիտական համատեքստում» խորագրով միջազգային գիտաժողովը, որին մասնակցել են դասախոսներ, գիտաշխատողներ, ասպիրանտներ, հայցորդներ ոչ միայն Հայաստանի Հանրապետության, այլև Ֆրանսիայի Հանրապետության և Ռուսաստանի Դաշնության համալսարաններից: Ամբիոնի նախաձեռնությամբ ԵՊՀ-ն անդամակցել է Ֆրանկոֆոնիայի համալսարանական միջազգային կազմակերպությանը, որը եվրոպական ուսումնամեթոդական և գիտահետազոտական լայն գործունեություն ծավալելու հնարավորություն է ընձեռում:

Ամբիոնն իրականցնում է «Անգլերեն լեզու, ֆրանսերեն լեզու և հաղորդակցություն» բակալավրիատական կրթական ծրագիրը։